Konpleman

Enn konpleman se enn mo ou group mo ki konplet/donn plis presizion lor mo ki presed li. Ena plizier tip konpleman:

(I) Konpleman Obze Direk (KOD)

Enn KOD se enn konpleman san prepozision ki plase zis apre enn verb ek ki reponn kestion: Ki? Ki sann-la?

Eg: Mo pe manz enn gato.

Ki mo pe manze? - Enn gato

Eg. Mo pe get Sarah.

Ki sann-la mo pe gete? - Sarah

(II) Konpleman Obze Indirek (KOI)

Enn KOI se enn konpleman avek prepozision ki plase zis apre enn verb ek ki reponn kestion: avek/ar ki? avek/ar ki sann-la?

Eg. Li pe manz avek enn fourset.

Avek ki li pe manze? - avek enn fourset.

Eg. Li pe koz avek Sarah.

Avek ki sann-la li pe koze? - avek Sarah.

(III) Konpleman Obze Segon (KOS)

Enn KOS se enn konpleman ki plase apre enn KOD ou enn KOI. 

Eg. Li pe manz enn gato (KOD) avek enn fourset (KOS). 

(IV) Konpleman Nom (KN)

Enn KN se enn konpleman ki swiv enn nom.

Eg. Li pe manz enn gato sokola. 

Enn gato sokola -> KOD

Sokola -> KN

(V) Konpleman Sirkonstansiel (KS) 

Enn KS donn plis linformasion lor sirkonstans laksion ki pe evoke. Ena plizier tip konpleman sirkonstansiel. 

a. Pou enn konpleman sirkonstansiel landrwa, nou pou poz kestion : kotsa?

Eg. Anna finn al Curepipe?

Kotsa Anna finn ale? - Curepipe.

b. Pou enn konpleman sirkonstansiel letan, nou pou poz kestion : kan?

Eg. Anna finn ale sink-er. 

Kan Anna finn ale? - sink-er.

c. Pou enn konpleman sirkonstansiel manier, nou pou poz kestion : kouma?

Eg. Anna finn al par bis.

Kouma Anna finn ale? - par bis.

(Ena lezot konpleman sirkonstansiel, par eg. konpleman sirkonstansiel koz, konpleman sirkonstansiel konsekans, konpleman sirkonstansiel mezir, konpleman sirkonstansiel konparezon,...)

Li inportan ki nou souligne ki dan enn fraz, kapav ena plizier konpleman. 

eg. Samdi dernier, mo finn al restoran dan loto avek bann-la. 

Samdi dernier - konpleman letan

Restoran - konpleman landrwa

Dan loto - konpleman manier

Avek bann-la - Konpleman Obze Indirek